Autora: Alba Losada García

Fotografía: Cris Armadanzas

De cara ó seu cincuenta aniversario a adega do Ribeiro Viña Costeira presenta un novo proxecto cultural para o vindeiro ano 2018, unha idea que agardan que poida prolongarse coma unha cita anual na que cultura e gastronomía van da man.

Terra de Viño

O Ribeiro é sen dúbida a rexión de Galicia con máis tradición vinícola e cuxos caldos son dos máis afamados da nosa Terra. Durante moito tempo o viño desta terra foi identificado co de maior calidade do país, e incluso dos mellores do mundo. Un sector que trouxo riqueza e progreso económico a toda a terra galaica, e cuxa repercusión chegou incluso o eido cultural, boa mostra diso é a frase dunha das cantigas de Afonso X na que o rei sinala o seu gusto polo “bon viño de Ourense”.

Este 2017 pasará á historia coma un dos anos máis duros para os viticultores por mor da climatoloxía adversa, as xeadas de finais de primavera e o pedrazo de agosto mirrou moito a produción e adiantou a data de comezo da vendima sendo unha das máis temperás, senón a que máis: “unha das colleitas máis difíciles e longas das derradeiras décadas”, dinos os organizadores do evento; “pero tamén unha das máis selectas, cousa que axudou a darlle máis calidade; e de maior maduración da uva, que viuse beneficiada pola falta de choiva e as altas temperaturas”.

Unha Tarde Extraordinaria

A presentación desenvolveuse nas viñas da adega en San Cibrao o 28 de setembro, cunha posta en escena moi especial integrada no espazo dos viñedos. Un ambiente moi cálido tanto polo boa temperatura coma polo agarimo da xente, amenizado pola actuación da artista bilbaína Isabel Fernández Reviriego, máis coñecida coma Aries. A parte gastronómica tivo o seu papel protagonista xa que os convidados puideron desfrutas dos caldos da adega acompañado de xamón cortado por profesionais.

Actuación de Aries

Viña de San Cibrao

O conselleiro delegado de Viña Costeira Andrés Rodríguez Gómez foi o encargado de presentar esta nova andadura cultural que ten coma obxectivo a renovación da propia marca do Ribeiro e o “re-descubrimento”  dun produto tan arraigado na tradición galega coma é o viño, empregando a combinación entre cultura e gastronomía apoiándose no espazo do propio viñedo coma escenario principal: “queremos integrar os eventos que fagamos no espazo da viña”, dinos en Petit Comite Andrés Gómez.

Ante a pregunta sobre os futuros eventos nosos anfitrións deixáronnos co doce na boca desvelando só que agárdannos moitas sorpresas que se irán desvelando durante o ano, aínda que algún xa é coñecido coma o da noite da Perseidas. Dende Orballo agardamos que esta nova andadura de Viña Costeira vos deleite con moitos Momentos Extraordinarios, únicos e dunha labor didáctica así como de favorecemento da sensibilidade cara os produtos da nosa terra , sempre de calidade, sempre coa máxima de ampliar as fronteiras do olor e do sabor.

Para saber máis…

Máis información atoparédela na páxina de Viña Costeira.