Autora: Alba Reigada

---

Fachada, leóns, patio, pasillo, hemiciclo, escanos…

Este é o paseo natural para chegar a ver a principal sala onde se fai democracia (literalmente). Unha impresionante estancia na que están sentados 350 deputados e deputadas, máis o persoal da Cámara Baixa.

Pouco se fala deste persoal, e en xeral de todos e todas as que fan posible o funcionamento do Parlamento. Aqueles e aquelas que están detrás, que non se ven.

Algúns e algunhas mesmo están xusto por debaixo dos escanos. A pouca, pero suficiente profundidade para que os equipos electrónicos non se quenten, nos accesos ao parking. Non moita xente sabe que alí hai unha porta estilo búnker e detrás, está o que se coñece coma a tv do Congreso, ou o que é o mesmo: Canal Parlamento.

Ninguén diría que baixo os escanos traballan 24 persoas para que todas as imaxes que vemos, de plenos, actos e comisións poidan saír ao mundo exterior.

Operador@s, redactor@s, editor@s…traballan na sombra, sen que case ninguén nos demos conta da importancia das súas funcións. Funcións que compren en condicións que están pedindo mellorar.

Quen leva a tv do Congreso?

Para comprender como funciona isto, compre entender primeiro quen o leva.

Este servizo audiovisual sae a concurso cada dous anos, prorrogables a dous máis. O mecanismo consiste en que varias produtoras presentan as súas propostas e é a mesa de contratación primeiro e a Mesa do Congreso en último caso a que elixe a que teña unha puntuación maior, que se divide en: oferta técnica e oferta económica.

Desde decembro de 2016 a tv do Parlamento retransmite o seu sinal a través de Mediatem, filial de Mediapro. Previamente o grupo xa fora adxudicatario do servizo entre 2005 e 2009.

Que reclaman os traballadores e traballadoras?

O 18 de abril deste ano, e despois dunha asemblea cos traballadores e traballadoras de Canal Parlamento, inícianse as negociacións ca empresa para un acordo.

No inicio destas negociacións, entregouse un borrador á empresa que se rexeitou, alegando razóns económicas pola partida económica do Congreso, á que inicialmente Mediatem puxara por debaixo.

O que reclaman é a equiparación das condicións laborais, é dicir, a igualdade entre traballadores novos e subrogados, e a subida salarial acorde aos salarios que teñen outras empresas do mesmo grupo (Mediapro), mesmos salarios e condicións por realizar as mesmas funcións.

Piden tamén unha actitude positiva por parte da empresa á hora de negociar, novas contratacións ou recoñecemento da “polivalencia”, e tickets de comida proporcionados.

A empresa: non responde a máis negociacións

Polo de agora, a empresa leva sen dar resposta de cara a seguir negociando dende o pasado 18 de xullo, cando se produciu a última comunicación.

Dende o 25 de xuño os traballadores e traballadoras de Canal Parlamento portan un lazo laranxa en sinal de protesta por esta situación.

Suposta esquirolaxe e despidos

A empresa acumula varias causas dende que comezou a prestar servizo ao Congreso en decembro do 2016.

Unha delas é a denuncia por, supostamente trasladar persoal do Senado ao Congreso para cubrir os postos dos compañeiros e compañeiras que exerceran o seu dereito a folga o día 8 de marzo. A data do xuízo é o próximo día 13 de novembro. (NOTICIA EL DIARIO.ES )

Ese día, con motivo do Día Internacional da Muller, a axenda incluía un coloquio que (a pesar de estar en folga algúns compañeiros e compañeiras) se chegou a emitir, e que contou coa participación de mulleres de diferentes ámbitos da sociedade e portavoces de grupos parlamentarios. Presidindo o acto no Salón de Pasos Perdidos do Palacio, a presidenta da Cámara Baixa Ana Pastor.

Ademais, no que levan de ano acumulan un total de 3 despidos que se produciron o pasado 29 de maio, dous días antes de que os delegados sindicais se reuniran ca empresa para continuar coa negociación do acordo.

Máis recentemente, a empresa supostamente asegurara a continuidade a un traballador en Canal Parlamento, que se encontraba cun contrato de interinidade e que entrou cubrindo unha excedencia. Sen embargo, o 3 de setembro a empresa incorporou a outra compañeira para que entrara no seu posto. O día 13 deste mes foi o seu último día como traballador en Canal Parlamento.

En decembro deste ano a mesa de contratación, e, en último caso, a Mesa do Congreso terán a última palabra para ver se renova a Mediatem no servizo, ao cumprirse os dous anos da adxudicación, prorrogables a outros dous anos.

Esta situación de seguro é descoñecida para moitos e moitas, tamén a existencia dunha tele do Congreso e polo tanto, tamén a existencia das 24 persoas que traballan para que poidamos ver o pleno, as comisións, os actos.

Canal Parlamento, ascensor, planta cero, escaleiras, patio, leóns, fachada…

Este é o paseo natural para  saír da principal sala a través da que podemos ver como se fai democracia.